நிகழ்காலமே நிஜம்...

என் மாதங்களின் ஆணிவேர்
என்னதான் நிகழ்காலத்தில்
புதைந்து கிடந்தாலும்
என்னின் சிந்தனைச் சிறகுகள்
எதிர் காலத்தையே வட்டமிட்டுக் கொண்டிருக்கிறது..
 

எத்தனையோ என் நிகழ்கால நிமிடங்கள்
கனவு தீயில் கருகிப் போயிருக்கிறது  
இருந்தும்  மீதமுள்ள சாம்பல்களை 
ஓரம் தள்ளி
எதிர்கால சருகுகளுக்காகவே
ஏங்கித்தவிக்கிறேன்...!

நிகழ்காலத்தில் நேரம் நகரும்
நான் நிலைத்துக்கொண்டிருப்பேன்...

 எதிர் காலம் என்பதில் நேரம் நிலைகொள்ளும்
நான் நகர்ந்துக்‌ கொண்டிருப்பேன்..
 

எத்தனையோ முறை சிறகு வெந்தும்
எதிர்கால தீயிலே 

தீக்குளிக்கிறது என் விட்டில் மனம்
 

நான் வடிவமைத்த

நாளைய நிமிடங்கள் 

ஒரு நாளும் ஒத்துப்போனதில்லை 

விடிந்த பிறகு..
 

இருகாலங்களிலுமே 

வசந்தத்தை தேடியே 

வாழ்க்கையை தொலைக்கிறது என் வானம்பாடிகள்...
 

மனமே இனியாவது 

உண்மையை உணர்
என்னதான் எதிர்காலத்தில்

மூழ்கிப்போனாலும் 

உன்னை உயிர்பித்துக் கொண்டிருப்பது 

நிகழ்காலமே...