கோச்சடையான் -க்கு போட்டியாக, பவர் ஸ்டாரின் ஆனந்த தொல்லை...எதிர்பார்ப்பில் பதிவுலகம்..!

தமிழ் திரைவுலகமும், தமிழ் பதிவுலகமும் மிகவும் ஆவலுடன் எதிர்பார்த்துக் கொண்டிருக்கும் பவர்  ஸ்டாரின் ஆனந்த தொல்லை திரைப்படம் வெளியாகாமல் தள்ளிப்போய் கொண்டிருக்கிறது. (இதற்காக மிகவும் வருத்தப்படுபவர்கள் சிபி செந்திலும், பன்னிக்குட்டி ராமசாமியும் தான்) பதிவுலகில் பலபேர் எப்படியாவது பவர்ஸ்டார் படத்துக்கு திரைவிமர்சனம் எழுதி மிகப்பெரிய ஹிட் எடுத்துவிட துடித்துக்கொண்டிருக்கிறார்கள். அப்படியிருக்க இப்படம் ஏன் இந்த தாமதம் என்று தனிப்பிரிவு புலனாய்வு அமைப்பை சார்ந்த சிலரை விசாரிக்க வைத்ததில் பல திடுக்கிடும் தகவல்கள் வெளிவந்துள்ளன.

பவர் ஸ்டாரின் முந்தையப்படமான த கிரேட் லத்திகா தமிழக சினிமா வரலாற்றில் மிகப்பெரிய சாதனையை செய்தது. அறிமுக நாயகன் நடித்து 2000 நாட்கள் (எலேய்.. அது 200 நாள்லே...) சரிங்க 200 நாட்கள் ஓடி சாதனை புரிந்தது. அந்த சாதனையை தற்போதைய ஆனந்த தொல்லை படம்மூலம் முறியடிக்க வேண்டும் என்ற நோக்கில் தான் பவர் ஸ்டார் பொறுத்திருப்பதாக தெரிகிறது.

தீபாவளி, பொங்கல், இன்னும் பல வெட்டா பீஸ் வெள்ளிக்கிழமைகள் போனப்பின்னும் படம் மட்டும் ஏன் வரவில்லை என்று சி.பி.சிஐடி போலீஸார் மிக தீவிரமான விவாசனையை முடிக்கி விட்டிருந்தார்களாம். (இதை ஏன் போலீஸ் விசாரனை செய்தார்கள் என்று தங்களுக்கு குழப்பமாக இருக்கலாம், பின்னர் திடீர்ன்னு படம் ரிலீஸ் ஆச்சன்னா பாதுகாப்பு பணியை எப்படி மேற்கொள்வது என்ற பயம் அவர்களுக்கு).

காவல்துறையினர், பவர்ஸ்டாரின் அகில உலக ரசிகர் மன்றத் தலைவரும், மிகப்பிரபல பதிவருமான ............ (பேரை நீங்களே போட்டுக்கங்க) அவரை அணுகி ஏன் இந்த தாமதம் என்று கேட்டதற்கு கடந்த நான்கு மாதங்களாக எங்கள் பவர் ஸ்டார் படமான ஆனந்த தொல்லை படத்துக்கு போட்டியாக எந்த ஒரு தகுதியான  படங்களும் வரவில்லை.  என்று கூறி திடுக்கிட வைக்கிறார்.

விஜய், அஜித், சூர்யா, தனுஷ், விக்ரம் என சாதாரண ஹீரோக்களின் படங்கள் மட்டுமே வந்துக் கொண்டு இருக்கிறது. இதுபோன்ற நேரத்தில் படத்தை திரையிட்டு அவர்களுக்கு நட்டத்தை ஏற்படுத்த எங்கள் தலைவர் விரும்பவில்லை. அதனால்தான் எங்கள் படம் தள்ளிப்போய்க் கொண்டிருக்கிறது என்று தெரிவித்தார். (எவ்வளவு நல்ல உள்ளம் பாருங்க நம்ப பவர் ஸ்டாருக்கு).

ஆகையால் பவர் ஸ்டாருடன் போட்டி போட தகுதியான படம் சூப்பர் ஸ்டாரின் கோச்சடையான் மட்டும் தான் எனவேதான் கோச்சடையான் ரிலீஸ் ஆகும் தீபாவளி அன்று ஆனந்த தொல்லை படத்தை வெளியிட முடிவெடுத்துள்ளதாக தெரிகிறது.

ஆகையால் பவர் ஸ்டார் அவர்கள், பதிவுலகிற்கும் தன்னுடைய ரசிகர்களுக்கும் ஒரு வேண்டுகோளை வைத்துள்ளார். தயவு கூர்ந்து படம் வரும்வரை காத்திருங்கள் படம் விரைவாக வரவேண்டும் என்று யாரும் ஆர்பாட்டம், கலவரம் போன்ற வன்முறை சம்பவங்களில் ஈடுபடகூடாது என்று வேண்டுகோள் வைத்துள்ளார்.

ஆகையால் கோச்சடையானுடன் வெளிவரும் ஆனந்ததொல்லை படத்தை அனைவரும் ரசித்து கோச்சடையான் படத்தை விட அதிக நாட்கள் ஓட வைத்து நமது பவர் ஸ்டாரின் புகழை உலகமெங்கும் பரப்புவோம்.

டிஸ்கி : எப்படி என்னோட ஆனந்த தொல்லை.